10/06/2007

كل الرسائل تنشر كما هى وبدون تصحيح للأخطاء الإملائية أوالنحوية

قالك: " تعالوا وحررونا " !؟؟؟؟؟؟

يصيح بعض الليبيين والليبيات من الداخل من حين الى حين قائلين لنا نحن المعارضيين الليبيين المقيمين في الخارج [ تعالوا وحررونا ارجوكم ] ..... [ ارجوكم بسرعة !] .... [ هيا في ايش تراجوا؟ ] ... [ تعالوا وحررونا من القدافي وصغاره وشلة المجرمين ] !

ووالله مثل هالكلام العجيب هادا مرات يجنني بالمرة ومرات يضحكني ضحك نييين نطيح ع الارض نيين المراة تحسبني خلاص فوتت وطلعت من شلاتيتي ! .... والله صدقوني راهو هادا كلام يجنن ويضحك حق !

يعني توه بالله عليكم معقوله نسيب انا اللي قاعد في العز والوز صغاري وبيتي وحياة الرفاهية اللي قاعد فيها هنا في الغرب ونجي لليبيا وطرابلس وبنغازي باش نحرركم انتم يا سادة يا كرام !!؟؟؟..... تي عاد آني قالولكم علىّ مجنون والا تشفوا في روايالي يسايلن من فمي ؟؟؟.... يعني حضراتكم تبوا مني آني نترك كل ها العز والهناء اللي قاعد فيه ونجيكم غادي وسط الحمو والنار بيش نحرركــــــــــــــــــــــــم ؟؟

باهي والله !!! .... ولكن قولولي بالله عليكم يا ليبيين يا مساكين أنا لو جيت غادي قداكم ومسكتني الحكومة قبل ماندير حاجه والا بعد مانطلق رصاصة والا رصاصتين وياخدوني ويشنقوني وسط الساحة قدامكم وانتم تشبحو لي وتتفرجوا على وآني ندلدل من حبل المشنقة ونفرفرط من حلاوة الروح وانتم تشوفوا بعيونكم واحد جيفة كرمكم الله من جيف اللجان التورية متكعبش في رجلي بالقوة يشد في للتالي , وواحد جيفة آخر يتفل على وجهي وانا نموت , وواحد تاني يهتف [الفاتح الفاتح ومانرحم من خان شنقا في الميدان ] وواحد منكم يقول في سره [ والله هالاخينا هادا مسكين ] ! ..... واحد آخر يقول في سره والا لصحابه وصغاره وين مايروح لداره : [ بالله شوفوا هالمهبول هادا كيف سييب حياته في كندا وجاي يموت بهالطريقة ]؟..... عاد شنو تحسابوني ياليبيين مهبول بالصحيح والا كيف ؟.... تقولولي [ تعال هيا حررنا يا سعوده ]!!؟؟ وآنا يوم ما نحصل غادي في يدين هالجيف - حاشاكم - ساعتها من يحررني منهم !!؟ ومن يبكي مع صغيورتي ومراتي في كندا يوم يشنقوني ويرموا جثتي في البحر !!؟؟ .

يعني – حضراتكم - تبوني – أنا واللي زي من الليبيين في الخارج - نسيبوا كل هالفتازيا والهناء ونجوكم غادي بيش نحرروكم ونموتوا في سبيلكم وسبيل صغاركم ونجيبلكم الحرية والرفاهيه وانتم - حضراتكم - حاطين رجل على رجل وتراجوا في العبد لله واللي زيه بيش نجيكم من مقر اقامتي في كندا ونضحي بنفسي وعيالي ومستقبلهم علشان حضراتكم تعيشوا في حرية ورفاهيه ومش عارف شنو ؟؟؟ هذا على فرض ان موتي جاب نتيجة وهو احتمال بعيد جدا جدا والا لكان غيري اشطر !؟

باهي والله !؟؟؟ .... ما نقص على الا هادي !! ... يعني انتم تبوني نسيب كل هالعز والوز والهناء والبحبوحة اللي آني قاعد فيها توه ونجيكم غادي قداكم بيش نحرركم من القدافي المجرم وصغاره ؟؟ ..... هادا اللي تبوه مش هكي والا لا ؟؟؟ .... ما صح والله وجوهكم يا ليبيين !!! ........... توه هادا كلام عقال والا كلام مجانين ؟؟ توه هادي معقوله بالله يا اولاد ؟ ..... تبوني آني نحرركم أنتم ؟....... شنوا قالوا لكم علىّ أنا سوبرمان والا رامبو والا سبايدر مان ؟؟

تي أنتم بحالكم سيدي عمر المختار اللي كاين عايش في الكهوف بشحمه ولحمه وحجمه الكبير ماقدرش يحرركم من الطليان !؟ توه جايين عاد تبوني آني العبد الضعيف اللي عايش عيشة الملوك آني وصغاري في كندا نسييّب كل هالعز والوز والبحبوحة ونجيكم غادي وسط جماهيرية شرابين الدم بيش نحرركم من القدافي وصغـــــــــــــــــــــاره ؟؟

تو بالله هادا كلام عقال والا مجانين ؟ ..... أنتم تتكلموا بجدكم والا تمسخروا على ّ؟؟؟

اسمعوا ياليبين ..... والله انقوللكم كلمة الحق واللي يريد يزعل يزعل راهي كلمة الحق وجاعة ... اسمعوني كويس بالله عليكم : والله راني آني واجعني حالكم وأنتم شعبي واهلي وناسي أهلا وسهلا وهادي ماعندناش فيها ومعاها أي كلام وأنا عارف ان القدافي المجرم وصغاره وقططهم السمان وكلابهم متعابينكم ياسر ودايرين فيكم الويل و اكثر مما داره قريسياني في ليبيا ايام الطليان ! , أنا عارف هاده كويس والله ووجعني حالكم لكن عاد حتى أنتم خلوكم ايجابيين شوية وواقعيين شوية !

يعني لما يجي واحد والا وحده من الداخل ويقولوا وينكم يا لي بره ؟ وينكم يا معارضيين ويالي دايرين روحكم معارضيين ! .... وين المعارضة الليبية متاعكم هاللي في الخارج ؟ ...... تعالوا بسرعة حررونا وخلصونا من القدافي وصغاره ؟ , تعالوا جيبولنا الحرية والرفاهية ؟ تعالوا ضحوا من اجل القضية والوطنية والاسلام ومش عارف شنو ؟

تعاد هذا كلام معقول بالله عليكم ؟ , يعني انتم حاطين رجل على رجل وقاعدين إتابعوا في اخبارنا في الجزيرة والعربية مرة مره وقاعدين إديروا في أفراح واعراس وحلويات ورز وعصبان وزرادي وبازين وامبكبكه ع البحر ودلاع وبطيخ والقرية السياحية ومش عارف شنو وبعدين وبعد مايملا الواحد منكم البطينه ويشرب عليها شيشة والا شيشتين مرادا والا بتري سودا والا حكة مشروب الشافي يتقرع هادكي التقريعة الليبية اللي نعرفوها كويس وبعدها يوقف ويعيط ويقول [ وينكم يا معارضة ياليبية ؟ , تعالي حررينا بسرعة من المجرم القدافي المجرم ] !؟ ... ثم وبعد ما يحس الواحد منكم أن الحكاية طولت ويشعر بالاحباط تلاقاه يقول: [ بلا معارضة بلا كلام فاضي بلا بطيخ ] ! ... او يقول [ ان كان عباك على بنغزي ]!!؟؟ ... او يقول [ ما يحس بالنار الا اللي واطي فيها ]!..... او يقول [ كلهم عملاء ]!! .... وبعدها يعبكها حكة ببسي كولا مستوردة و يتقرع هاذكي التقريعة الليبية اللي تعرفوها ويشد السيفون !! .

تي عاد هادا كلام ؟ تي معقوله هادي ياليبيين ؟؟؟ .... تبوا الناس اللي بره هاللي ظروفهم المادية مية المية وعايشين هم وصغارهم في بحبوحة يجوا للبلاد المدمرة يضحوا بانفسهم وصغارهم علشانكم وعلشان صغاركم ويخلصوكم ويحرروكم من القدافي وصغاره ؟؟؟؟ ...... والواحد منهم وين يحصل في يدين الحكومة والقدافي واللجان التورية ساعتها حرام ما يلقى واحد منكم يوقف معاه والا مع صغاره والا حتى يبكي عليه او ينشد عليهم ؟...... تي هادا منطق والا كلام يا ليبيين ؟؟؟ .... تي عاد ريحونا الكارطة بالله عليكم وبلاش شعارات ودفنقي ودف مراكب لليبيين اللي في الخارج !.

والله اسمعوا ياليبيين .... اسمعوني مليح وياسر ... تبوا الحريه والرفاهيه وحياة زايطة كيف مافي الخليج ومش عارف شنوا معناتها تحركوا شوية وساعدوا سيدكم عبد السلام بحبيل !

أما المعارضين في الخارج فوالله هم كثر خيرهم وبارك الله فيهم اللي مازلوا يتكلموا عنكم وعن مأساتكم امام العالم ويدافعوا عن ضحايا القدافي وعصابته المجرمة عند منظمات حقوق الانسان ! .... والله بلكي تحسابوا أنكم تدفعولهم في رواتبهم واجرة الوقت اللي يعطوا فيها للقضية من جيوبكم ؟؟ .... تي همه كثر والله خيرهم وبارك الله فيهم اللي مازلوا صابرين ومش ناسيينكم ومازلوا يحاولوا مساعدتكم واقناعكم بأنكم انتم وحدكم لو تريدوا الحرية بالصحيح قادرين على اسقاط نظام المجرم القدافي في ثلاثة ايام او اسبوع على اكثر تقدير ! ... لكن حضراتكم تقولوا لا إحني ياودي مانقدروش ! .... أنتم اللي تعالوا وحررونا !!

اسمعوا والله تبوا الحرية والرفاهية فمعناها هدا حصانكم وهدى السدرة وهيا ورونا شطارتكم !؟ .. هيا تحركوا وحركوا بعضكم ونضموا صفوفكم من اجل التحرر والحرية وحياة كحياة الخليجيين على الاقل والا والله العظيم بالثلاث وعلىّ الطلاق من المراه بالثلاثة راهو مافيش حد يحرركم لا امريكا ولا سوبرمان ولا حتى سبايدر مان ولا حتى المعارضة الليبية في الخارج مفهوم والا لا ؟

لا وقالك شنو ؟ .... سيبوا معيشتكم الزايطة في كندا وتعالوا حررونا !!؟؟

بلكي تبونا نوكلوكم ونشربوكم فوق البيعة ؟ والا تبونا نشيلوكم حتى للحمام ونكرولكم حبل السيفون ؟؟؟ .. ولله ما مازلت الا هدي ؟؟؟ ...... والله ماله حاله وخلاص !!؟؟ ..... قالك (تعالوا وحررونا ) يا اولاد !!؟؟

سعدون بن سحنون