حوار أم شجار مع (لجني ثوري) ؟ (1)
تحية طيبة
هل من الضرورى أن
نفهم ؟
* لا ليس من
الضروري ان تفهم , فكل شيئ سيفهمه لك وبالنيابة عنك القائد وشركائه وكل
الحواريون بالوطن .. ونحن لا نريدك ان تتعب لأنك ابن لهذا الوطن .. ونحن لا
نحب التعب لأبناء الوطن .. وانت بالذات لست مؤهل علمياً وفكرياً لكي تفهم ..
وان أردت ان تقهم اذا انت رجعي وعميل وخائن وكلب ضال وزنديق و..... و ..... ,
وانت من اصلاً لكي تفهم.
- ولكن النيابة والتمثيل هي
تدجيل بالفكر الأخضر ؟
* اه... اه امالا
شنو .. التمثيل تدجيل ولا نيابة عن الشعب .. ودوم أمعمر هو القائد ومنغيره
خراف وزايد .. ومنغيييييره ومن غيييره ... (شيلوا) منغيره , منغيره ...خراف
وزايد.
- يقولون ان المرتبات زادوها ؟
...
* نعم المرتبات
قصدك ستزداد نقعدوا كيف اليمن السعيد ... فالمجتمع الجماهيري دائم الرخاء
وزيدات بالمرتبات.
- ولكن سمعنا ان البلاد تعاني
من فقر وانحدار خطير لحقوق الحياة البشرية ؟ ..
* من قالك الكلام
الفارغ هضا .. انت واحد دايريلك غسيل دماغ وعميل خطير وتسمع للرجعية .. حقوق
حياة بشرية مرة وحدة .. اهو قاعدين يجاروا عليكم ويزيدوا في المرتبات ويعطوكم
في القروض شن تبوا اخرى ... تي شن تبوا اخرى ؟ زيطة وزمبليطه يا فالح.
- لكن سمعنا ان الليبيين يتقاضوا بأقل مستوى
للمرتبات ؟
* كلام فارغ ..
كلام فارغ .. اعلى مرتبات هي مرتبات الليبيين .. والقائد مش أمعقب جهد بيش
يرفع من مستواكم المعيشي .. ويبيكم ديما فرحانين ولا بسين كنادر عيد جديدة ..
ديما عيد.. ديما عيد .. وقديد.
- تكيف كلام فارغ ..؟ والأرقام أتقول انها كلام
مليان وصحيح وان الليبيين من اقل الشعوب مستوى للمعيشة, وغير المعيشة وحتى
موتهم مش طبيعي .. يا حادث سيارة .. يا قتل .. يا ضغط دم .. مفاجئ يا .. عمك
السرطان اللي قعد معرفة وصحبة مع الليبيين ويقوللهم عيني عينك (كيف حالكم شنو
اخباركم يا خوتي) ودايرلهم عزايم وذبايخ ميه ميه .. نين الليبيين اقعدوا
ايغنوا عليه في الغيطة .. سرطان مرحب مرحب .. سرطان مرحب مرحب .. يا وينك يا
وينك يا سرطان .. يا وييييينك يا ساسو .. ساسو .. ساسو ؟
* الله ايسود
أمعيشتك ..ايوا .. وانت واحد الباين عليك تبي شيلة كبيرة ..
- شيلة وين ؟؟
* شيلة في مكان
ايطيح فيه أسعدك .. وسعد اللي جابوك .. واللي جابوا اللي جابوك .. وضنا عمهم
حتة هما امعاهم, ما اكثر هرجتك وانت ديما اتنوح.
- اه قصدك مكان للتأهيل والإصلاح ..
* ايوه وسع بالك
وبلاش كلام فارغ ..
- تي توا يا (لجني ثوري) 100 المية .. أجنيه ليبي
كم يطلعن بالدولار ؟
* مش قتلك انت
دايريلك غسيل أدماغ .. ما اسماش أجنيه يا جاهل, يا رجعي, أسماه دينار ليبي
عنقاري .. عليه صورة القائد الفنطازي .. منغييييرة منغييييرة ..
- باهي خليه دينار فكم تسوى المية دينار بالدولار
؟
* يطلعن يا رجعي
تقريباً 80 دولار .. دولار ينطح دولار .. يعني يا جاهل الـ300 دينار ايساون
.. ايساون 240 دولار .. يا رجعي .. يعني شن تبوا
بعد هكي .. يعني في السنة الكاملة يقعد الدخل 3600 دينار ليبي عنقاري .. و
2900 دولار امبريالي يا جاهل ..ويش تبوا بعد هكي وها هم ايزيدوا فيكم واخرى
..عز ما ابعده عز يا عازه.
- ههههههه لكن سمعنا وقرينا وعرفنا ان متوسط الدخل
بدول الخليج العربي اللامبريالي في الشهر الواحد يوصل لـ4000 دولار في الشهر
الواحد . أي يعادل الـ 48000 دولار في السنة الواحدة يا ثوري يا متعلم ..
يعني الـ 15 ليبي ...... ولا بلاش فضايح خير ..وخليها ساكته خي.
* شنو .. شنو
48000 دولار في السنة .. تهضا كلام فارغ وكذب .. واصلاً الدولار عملة
للأمبريالية والرجعية .. ودول الخليج فاهمين
الموضوع غلط .. وبعدين دول الخليج معندهمش قائد كيفنا .. دوووم .. دوووم ..
دوووم أمعمر هوا القائد منغييييرة منغيييييرة منغـ....
- باهي باهي فهمنا.. خراف وزايد ... يعني قصدك ان
دول الخليج طايحين جهد والنفط ايبزعقوا فيه هكي وخلاص ..والأرقام هذي هي
مؤامرة علينا نحنا ولا شنو ؟ والعقالات ما اتفكرش كيف الشناني وخبراء
الأقتصاد اللي عندنا.
* ايوه اهوا بديت
تفهم الكلام وجيت للطريق ..ااااا هكي تعجبني .. ايوه سلم اوليدي ..
تي .. اصلاً دول الخليج ناسهم محسدية
ويدرهولنا في كبدنا واجد .. ويبنولي في عمارات ومدن في وسط الصحرا ..
ويتفحولوا .. تي توا هضا مش مش بزعقة زايدة ..
مش كان خذولهم افكار القائد ودارولهم مؤتمرات وجمعيات تعاونية مش خير
.. وبدل من العقال ايشيل واحد راس ايشيل اثنين راس
.. تبذير .. تبذير ..
قلة حيا .. نو حشم .. ولا كان دسوا الفلوس أمتاعهم وداروا (فكرة المجنب) بدل
هال المصاريف الزايدة .. تي ..
أصلا دول الخليج همهم في البزنس وخلاص ..
- لكن البزنس اللي اتقول عليه با خونا .. يا ثوري
خلا حياتهم صح وتعليمهم صح وصاعد وعلى الأٌقل الخليجي يمشي قدام الناس
والعالم مرفوع الراس, مش كيف الليبي يمشي وهو فرفاري الراس .. فلالالي الراس
.. فلاسي نكادي, وضاربه الهم والنكد من جميع التراكين وما يطلعش بره إلا
للعلاج هضا كان اقدر يطلع طايح السعد .. والبزنس والمصاريف الزايدة اللي في
الخليج شيدت لهم منازل صحية ومستشفيات عالمية وطرق من الطراز الأول ودواء ..
وأركبتهم أحدث أنواع السيارات والطائرات ...لكن نحنا لا جينا لا .. لا
جيتارة .. ولا حتى زكرة .. واقسملك بالله يا ثوري ان فيه وحدين ايقولوا ان
ليبيا باب من أبواب الاخرة وهي عذاب واقع ولكن فيها جمعيات العازة والفقر
ومحطات بنزينة .. واحتمال وحدين عندهم ليبيا نعيم ارضي من اللهف ..
من اللي دار هكي لليبيين وخلاهم هكي .. مش الدفنقي امتاعكم .. وانتم
أتقول دايرين بالعاني في الليبيين ولا ...عدوا لفريقيا .. اتلزوا فينا من
ابلادنا .. رايحة اتقول ابلاد بوكم لول ..
عدوا انتم لفريقيا
... انهشولكم نهشة كلبرة .. وأعفسوا مع الف الف الف ومليون سلامة .. تعلموا
رقصات الأفارقة والزنوج .. وهزوا نينين تبطلوا ...والشعب الليبي على استعداد
تام ان يجلب لكم أحسن مدربين للرقصات الزنجية وانتم ميتين على افريقيا ...
عدولها انتم افريقيا ... مش اتقولوا حرية يا كذابين ...وانتم سودتوها نين
كرهنا اليوم اللي قعدنا فيه ليبيين ...انتم يا ثوري تجملوا علينا ببلادنا ولا
شنو ؟؟؟ تهذي راهي ابلادنا مش ابلاد جيراننا ولا ابلادكم انتم بس يا ... (
لجني ثوري).
* اسكت ..
اسكت .. وانطمر انت واحد تبيلك علاج عندنا
ما فيش نقاش ..
- عندكم وين ؟؟ .. تي نحنا انهدرزوا .. وبعدين
نحنا جيران .. وبعدين رسول الله (صلي الله عليه وسلم) وصى علي سابع جار ولا
وصايا القائد هي اللي ماشية ووصايا الرسول لا ؟؟!! .. وانتم ديما الشيل عندكم
واتي وجاهز الـــ .. عطكم البلاااااا والخلااااااا.
* انا مع أي واحد
رجعي معنديش الريح وين تبرم ... حتى كان خويا ولا بويا.
- ما شاء الله .. ما
شاء الله عليك فحل ما أبعده فحل .. حتى خوك اتشيله وبوك اتودره في ستين داهية
.. ما شاء الله... ما شاء الله ... وعليش هال البطولة كلها ..
انت شايف يا لجني يا ثوري كيف اوجوهكم امقلبات .. والتقليبة اقعدت
اتزيد يوم بعد يوم .. نين قفد منظركم اطروح ..
واحتمال عميلكم هذي اتخلي وجهكم كيف وجه (دانبي)
* امفلبات ..
امقلبات .. امفلبات ..
دانبي .. حيه عليك وحيه .. نهارك اسود
نهارك اسود واكحل وازرق .. توا أنوريك ..
- اتوري .. تي امشي روح واعلا ما في خيلك اركبه ..
يا بصاص.
*
بصاص .. بصاص .. حيه على امــ
.. حيه حيه على امــ .. حيه الو ..
الو .. الو .. ميلود ميلود ..
ميلوووووود
- ايوه يا لجني امعاك ميلود .. ميلود ميلود جيب
الجماعة كلهم وتعال ابسرعة .. ابسرعة قلتلكم .. (قفل الهاتف)
.. توا انوريك الخيل والحمير وكل حيوانات من اجل البقاء اللي شفتهم في
عمرك.
انتهى الجزء 1
والسلام عليكم
بنغازي 17 -
ح ع م
|
