{من
مذكرات شاب بالمعتقل} حوار أم شجار مع (لجني ثوري) ؟ ..التحقيق والمعتقل (3)
تحية طيبة
احدهم يسأل.. هل
هي حقيقة أن من ينطق بالحكمة أو المنطق ستكون تلك أفعاله وطباعه ؟ فهل من قال
(أن الجهل سينتهي عندما يقدم كل شيئ على حقيقته) بإعتبار مرادف هذه المقولة
الثورية وبالمنطق وجوهرها هو الشفافية واللاكذب فهل هو كذلك ؟ فهل من اخرج
الكتاب الأخضر, كان قد عمل بفقهه ولتتحول نظريته لتنطبق وعليه هو أولاً .. ؟
ام هو خليط من الكذب وشيئ من الواقعية للإستمرار ؟ ولكن الإستمرار لأين ؟..
بحيث ما تمر بشارع و بأي مدينة لتجد تلك المقولة أمامك لتفهم إننا اهلاً
للصدق والشفافية ..فهل نحن كذلك ؟ (مقتبس من مقال لمحمد الجراح).
(نهاية ما ورد بالجزء /2.. الحكاية باللهجة
البنغازية مع الإعتذار وكما ورد ) وأنوه ايضاً انه تحدث
بعض الأخطاء المطبعية الغير مقصودة فنعتذر
ايضأ .( تصحبح كلمة بأخر سطر بالجزء الثاني).
...
وبعدين يا شينك اقطاف زايد أبلاد خاربة شنو فيها ...ما فيها شي ...
ولا خلاص كان أقعدت خاربة ... وما تقعد خاربة انشالله ما أصلحت ... توا باهي
هال التكركيره السودة .. توا باهيه قدام هلك وأمك ..والشارع كله ....بلا
أبعدك الشمامتية واجدين ... والعرج اكيده فرحان حتى هوا ... واديرلي في روحه
ديما بطل الفيلم , ودايرلي رسائل غرام ..يا عليك القديم , وبعدك جايبها له
على خشمه... بلا..بلا.. يا شينك هزيبة .. ودايرلي روحك حتى انت بطل الفيلم ,
جامعة واكتابات ومحاضرات .. وعطور ...وكنادر .. ومرات قروايط ... باهي توا
... ترحيت ... بلا (بو الشدوق) شكله نواي الضرب ؟؟
(وأذن لأذان الفجر..
من بعيد في سكون الليل وصمته القاهر .. الله اكبر.. الله اكبر.. للننتقل
بالجزء التالي بداخل المعتقل للتحيق.. فما شكل مكان المعتقل ؟ ومن هم زواره ؟
ومن هم سكانه ؟ ومن هم حراسه ؟ وما هو ذاك التحقيق وشكله ؟)...
* أنزل ...أنزل ..نزلوه
الـ.....!!! تعال ..تعال يا باتـــي ..تعال يا بيييي ..تعال يا أنت وأشعيراتك
..قرب قرب ... لا أتخاف يا غالي ..لا أتخاف عندنا امشاط هنا.. وكريمات وحتى
استشوار حامي عندنا ... كروه .. التيـ........ , كروه ,, كر ,, حرام فيه يمشي
على كرعيه ..حرام فيه..تعال تعال تعال .
- يا ريتهن تقطعن
كرعيه قبل لا أنجيكم هنا, لوكان هضا راني متريح علي سرير في الجلاء .. وبعدين
ريت هال الشكل ..خزيه وبعدين هضا شنو يطلع ..أزعمك هضا هو بوها كيالها هنا
.... لا ما أنضني يا ودي هال الشكل المسردن هو اللي أهناك هنا .. تيماهو كلهم
نفس النموذج .. خزيه ...وبعدين انت شنو ترفس ؟؟ جلاء ..أمسردن .. و بوها
كيالها ..
*شنو اتمتم يا فرخ
؟ ... شنو اتقول ؟
- لا ما قلت شيي
يا أفتدي .. ما قلت شيي يا أفتدي؟ (تماهو أتدفهم كلهم أفنديه وخلاص ..أفنديه
أفنديه .. وبعدين شنو فيها كان هال الشكاربو قعد أفندي ..ولا أخساره فيه
التفنديه والعنقره ؟... وبعدين كلمة أفندي شنو معناه ؟... اه ..اه .. معناها
اكيده كابو .. لا اكيده كابوا .. وكابوا معناها حاجة كبيرة ورئيس و كوماندو
... هههه يعني هال الشكل كوماندو ؟) كوماندو ...فيرننادوا ...نهارك احرفننادو
اسودانندو ...
* جيبه من هنا ..ما
الباب الوراني يا عبد الدايم ..
- بلا الجماعة ما
أتقول إلا لاقيين لقيه فرحانين كلهم ...ما الباب الوراني يا عبد الدايم ...
لا عبد الحليم حافظ ... يعني بو الشدوق اسماه عبد الدايم ..وما دايم إلا وجه
الله ... صار سي عبد الدايم هوا بو الشدوق اللي سب الحاج في شارعنا ؟ ..يا
زينك نهار ...وبعدك عبد الدايم قاعد على حرك .. وشكله متخصص أكفوف .. وبعدين
شكله كنا بليد وعيونه أمهدلات ... غير نطلع والله ... نرسم عبد الدايم ونكتب
عليه هذا هو شكل الغبي .... غبي .. الغبي .. وانت شنو تطلع يا ذكي ؟ انت أغبى
الأغبياء ؟... وبعدين الكوماندو شنو اسماه الحقيقي أزعمك ومرات يطلع من عربنا
؟ بيش انتلسوللوله بلكي اطلعني من هال الكاينة ؟ الله رائحة شاهي..شاهي ..الله
الله والله شاهي ... بلا الدار هذي شكلها أمتاع الشاهي ... لا باهي.. لا باهي
طالما فيها شاهي معناها قرصت أوذينه بس .
* مبروك .. مبروك
,, إنعم ,, إنعم ,, إنعم ,, افتحله رقم خمسة اللي فيها الكلاب الثلاثة ..
حاضر ,,حاضر..
- كلاب ثلاثة ...
بلا .. بلا ... انشالله يبوا إحطوني مع الكلاب .... يا أفندي .. يا أفندي
المبروك مش معقوله عاد مع الكلاب ..
* اسكت ... اسكت
.. يا أحمار ..اسكت يا وجه الــ.....
- ( بلا وذني ..وذني
...وذني وذني راحت فيها ) بلا المبروك أمتاع الكفوف طلع مش بو الشدوق ...بلا
تهضا مش كق قصدي كف ؟ لا مش كف ؟ هضا سحق على الوجه ... ( أنجوم ...أنجوم..)
بلا ...يا شينك شكعة والله !!
* خش ..خش .. يا
أنعن بوك ..يا كلب ..خش .. يا فرخ الـ.....ـة!!! الـ......طة!!!.
- (لا حول ولا قوة
إلا بالله ..بسم الله ..بسم الله .. بسم الله .. بسم الله الرحمن الرحيم )
بلا اهو الدق الصح ..يا شينك دفره .. بسم الله.. بسم الله ... توين الكلاب ..من
هضا ؟ بلا الدنيا ظلام ..ظلام دامس يا بوها ...وبعدين وين الكلاب الثلاثة ؟
بسم الله.. بسم الله.. تش ..تش ..تش .. خليني انصاحب الكلاب من توا خيرلي يا
بوها ... تش .. تش .. تش .. لا خير ما يركبن فيا عض ..تش ..تش ..بوبي .. بوبي
..تش تش .. (وبعدين المبروك كنا سكر الباب هكي ؟ اتقول عمرا ما سكر فيها باب
... بلا يا عليك تسكيرت باب ..أهو .. تسكير البيبان على أصله .. خليهم خليهم
..خليهم إيخافوا اليهود ...أمالا شنو .. اهم الرجاله صح يا ايهود .. يا
صهاينة ... امالا دولتنا تلعب ولا شنو ؟ .. ايربوا في رجاله مش دفنقي ...) تش
..تش بوبي بوبي ... بسم الله الرحمن الرحيم ...تهضا شنو اللي خشيت فيه ؟ بسم
الله .. بسم الله,,, تي هضا بني ادم يا سي البي, بني ادم مش كلب ؟ اه ... بني
ادم يقرا ... بسم الله الرحمن الرحيم ... خير ... خير ... السلام عليكم ...
لا حول ولا قوة إلا بالله ... خير ... خير ... خير يا خويا .. وبعدين تشنو
هال الحفرة ... يا شينك بنه ... لكن رائحة الشاهي امغطيه والله ... لوكان
المبروك ايجبلنا اطويسة ... خير يا خويا ... (السلام عليكم ورحمة الله ..السلام
عليكم ورحمة الله) ...تي بلا صار الجماعة ايصلوا ...(أستغفر الله العظيم..
استغفر الله العظيم وسبحان الله) خير .. خير ... مرحب مرحب ..كيف حالك ,,
تيباهي اللي رديتوا عليا والله ... انشالله خير ..انشالله خير ... تعال تعال
تريح هنا ,,, بارك الله فيك .. تي والله ما انشوف فيها في حاجه باهي ..,,
هههههه ..توا اتعود عال الظلام ... الظلام .. تريح تريح هنا ... أيوه هنا ...
التتيو.... قالولي كلاب اللي في الزنزانة ... خزيه ..,, أسسسسس اسسسسس فكنا
منهم بالله عليك يا بو صاحب, وكلمة اتيـ .... اتوريك اللي ما شفتاش ...أسسسسس
اسسسس فكك ..فكك منهم ,, كنتم اتصلوا ولا شنو ؟..الحمد لله .. تباهي والله
حبس وصلاة ..مية مية.. تقبل الله تقبل الله منكم صالح الأعمال والله .. أضربك
المبروك ؟ ,, الله ايكسر ايديه انشالله ....اسسسس .. اسسسس اسكت يا راجل فكك
منهم ,,(تييم) وصلي الصبح يا خويا قبل لا تطلع الشمس .. تكيف حتى وين اتوضوا
ما فيش ولا شنو ؟,, لا عل التيمم يا خويا.. والله ايفرج علينا أجمعين ..مش
مشكلة التيمم خير ما فيش بكل .. لكن حمام ما فيش ولا شنو ؟ خوذ شيشة هال
المية كان تبي ؟ لا ...لا ..لا بلاش بلاش معني مزرور زرة شينة ..مش مشكلة
طالما الزر في سبيل خدمة الوطن .. خزيه عل الصهاينة خزيه عليهم .
ولنلتقي بالجزء
التالــي من التحقيق والمعتقل
انتهى الجزء 3
والسلام عليكم
بنغازي 17 - ح ع م
راجع الجزء الأول
راجع الجزء
الثاني
|
