20/03/2007

كل الرسائل تنشر كما هى وبدون تصحيح للأخطاء الإملائية أوالنحوية

{من مذكرات شاب بالمعتقل} حوار أم شجار مع (لجني ثوري) ؟ ..التحقيق والمعتقل (4)

( ولنقرأ الفاتحة جميعاً لروح ضيف الله الغزال )

تحية طيبة

يقول احد شعراء تونس الخضراء ويسال: لماذا جيشنا لم يطلق رصاصة واحدة على من يتسلح بالمفترض له أو يحارب العدو الحقيقي هناك وكما قالوا لنا ؟ ويحمى هذا الجيش الوطن والمواطن .. والذي أدفع أنا دمي و ثروة البلاد لأجله ولكن جيشنا يطلق الرصاص عليا انا ويعتقلني انا ويرهبني أنا بالشارع وحتى وأنا نائم بامان الله, وينزع كرامتي أنا, فمن أنا ومن هذا الجيش ؟

ويقول احد آخر من ليبيا, جيشنا الليبي تحول الى ثكنات خاوية ليصبح الجيش الى أجهزة أمنية, ولكن أي أجهزة أمنية هذه ... وامنية لمن ؟ فهل تحول الشعب الليبي الى العدو, ولكن عدو لمن ؟ ليصل عدد الأجهزة الأمنية الى رقم كبير بداخل البلاد ويقوده قادة فحول بعالم الجريمة والتعذيب والقهر .. ولماذا ؟ ولماذا ؟ هل مكونات تلك الأجهزة من البشر تختلف عقلاً وانتماء للأهل والوطن ؟

نهاية ما ورد بالجزء (3) الحكاية باللهجة البنغازية مع الإعتذار وكما ورد...

كنتم اتصلوا ولا شنو ؟.. الحمد لله .. تباهي والله حبس وصلاة .. ميه .. ميه .. تقبل الله تقبل الله منكم صالح الأعمال .. أضربك المبروك ؟, الله ايكسر ايديه انشالله .. أسسسس .. أسسسس اسكت يا راجل فكك منهم ,,(تييم) وصلي الصبح يا خويا قبل لا تطلع الشمس .. تكيف حتى وين اتوضوا ما فيش ولا شنو ؟,, لا عل التيمم يا خويا.. التيمم رخصة لمن لم يجد الماء .. والله ايفرج علينا أجمعين .. مش مشكلة التيمم خير ما فيش بكل .. لكن حمام ما فيش ولا شنو ؟ خوذ شيشة هال المية كان تبي ؟

بعني انكلم واحد من هال الأجلاف انقوله نبي الحمام .. لا .. لا .. لا بلاش بلاش معني مزرور زرة شينة .. مش مشكلة طالما الزر في سبيل خدمة الوطن .. خزيه عل الصهاينة خزيه عليهم .. وهضوما شنو أسماهم (خلاينه) ؟ يا فرحتك يا وطن بيهم يا فرحتك الكبيرة يا وطن.

اذا كانوا بالغرفة ثلاثة اشخاص كنت قد بدأت أتعرف عليهم لولا غلبت النوم عليا, ولما وجدته بالليلة الفائته, ويا زينك ليلة, ليلة عنقاري يا بوها, ربي لا إيجيبها لصاحب, لكن مش مشكلة بسبيل هناء الوطن وأمنه, ولكي يبقى الوطن دون أن يمس من الأعداء , لكن تمن هما الأعداء ؟ سبحان الله يعني نحنا طلعنا صباغين دحي, ونحنا هما الصهاينة والرجعية, تباهي تبلكي سي الرجعيين دايرين مؤامرة كبيرة علينا ونحنا مادين أوجوهنا ؟ تبلكي سي الرجعيين أمفتلكينا أدمغاتنا بيش انخربوا الوطن ؟ لكن بلا الرجعيين معناها واجدين يا بورحيل ؟ بو رحيل من ؟

اكيدة حتى بو رحيل حتى هوا رجعي , وبويا رجعي وجيراننا رجعيين واللي في الجامعة راجعيين وعيت عمي وخالي رجعيين, تي اللي نعرفهم كلهم رجعيين الـ .. بلا,, بلا,, تكلهم رجعيين .. حيه علينا حيه تي .. الوطن كلا قعد ملم للرجعيه يا بوخال إلا لجني ثوري يا بوها هو اللي صح وثوري .. معناها المفروض ايسموا ليبيا, الجماهيرية العظمى الخطيرة للرجعين خزيه الشعبية, معناها عندا الحق معمر أمصيف حالكم ودايرلكم في الرز اعظام’ هضا كان اليقيتوا حتى العظام !!, يعني هو الوحيد اللي أدماغه يشتغل صح وتقدمي ومتنور والبقية عقاب لمد..

تي كلكم رجعيين وامبرياليين يا عرب ولا شنو؟ .. وبعدين كنا سي لجني ثوري ما يمشي يجسس على اليهود ؟, ويكتب شي تقرير ولا أثنين عليهم ؟ وعلى الأقل انقولوا اهو حتى نحنا عندنا (رأفت الهجان ليبي ولد ليبيه) والجماعة البصاصة لاصقين في أوجوهنا .. تي حتى الجوامع ما سيبتهنش مالتقارير, تي حتى الشيوخ ضربتوهم فلقة, شيوخ زنادقة ورجعيه .. وجيبه جيب الكلب, جيب الزنديق, جيب الكلب الضال وجيب الصايع .. وبعدين إيجيبوا من ؟ وراكبين فينا معتقلات ومداهمات .. وسب .. وعدوا لافريقيا .. تكيف انعدوا لافريقيا وأنسيبوكم وحدكم في هال البلاد الشينة الخاربة ! ؟

اهماه اليهود يا بصاصه .. ولا هضكما أنويره يا كرارين الحبل .. خزية ...اسسسسس اسسسسس .. فكنا يا سيدي وتراه تمرقد وهضا كان اليقيت وين ترفد .. عال الستاك يا بوها .. الستاك با عمو .. الوطن اللي يحمينا ايرقد فينا عال الستاك ويضرب فينا ويهين فينا, ومخلينا أمهزبين, ومخلينا امفلسيين ويعلم فينا بالكذب, ويراقب فينا ليل نهار, تي خلاص .. تي ماهوو سي الوطن معش عنده خدمه لا قدمه إلا نحنا .. ولوكان سي الوطن يلقا ايلزنا واحد بعد واحد, هضا هوا الوطن اللي يحكولنا عليه, واشتشهد سيدي أعمر والشهداء كلهم في سباه, و الدم, ونحنا افداك .. أفداك من يا وطن, وانت اتهزب فينا للنخاع, خلاص أحسبونا من جماعة (التبت) تبلكي خير يا سي الوطن ...

* انت ..انت .. نوض يا فرخ ..انت يا فرخ نوض ... نوض ولا أنزيدك .
- أي .. اي .. اي باهي ياسي .. باهي باهي الله يرحم والديك .. اي أي (الكتشوات واحد بعد لاخر)
* نوض منوض انشا الله ..نوض يا كلب .. هضا اللي جابوه البارح .. انتم يا خروات .. يا فسا .. ؟..
نعم هوا .. صبي يا باتي واخذ على تنويضت ماما .. نوض يا فا .. نوض.
- حاضر .. حاضر والله نضت ... (بلا يا شينك حاله .. كاتشوات متعلمينهن يا راجل أتقول في اليابان متدربين الخروات شكلهم, تي بلا توين واخذني هضا ؟.. تي هضا منو ؟ أشكال جديدة شكلهم ؟ مش أمتاع البارح ؟ أشكال جديدة ؟ بلا شكلها من الطبق للكوشة .. يبو يبدوا فيا الجماعة ما لول ؟ .
* أطلع من هنا .. تي أطلع من هنا يا حيوان .. تي قتلك من هنا .. راني انكسر وجهك المعفن تكسير.
(كنا نمشي في الممر, مع إكتشافي لزنزانة مقابلة للي كنت فيها بالتمام, وأثناء التقرب منها أستمعت لهمسات تخرج منها, أي كان هناك ناس فيها .. وكانت أخرى وأخرى, الى الوصول لفسحة بمربع يوجد بها غرفتين متاقبلتين, والمقابلة لي كان يجلس بها واحد على مكتب ويمسك بيده أوراق, كان السجان المتجهم الملتحي يوجهني بيده نحو تلك الغرفة بكل قوة, والتي تفوح منها روائح الدخان, وشكلها لها وقت طويل ولم تنظف بدليل العنكبوت بالسقف , والرئحة المعفنة شكلهم واخذين عليها ولكن هؤلاء من لكي ينظفوا ؟ ولمن سينظفوا ؟)
* امشي, أمشي ..... خش هنا, قعمز.
- (لكن لا يوجد إلا كرسي واحد مقابل المكتب ملاصقاً للجدار, فجلست على الكرسي مباشرة, راخياً جسدي المتهالك من قلة النوم والليلة الحرفة , ولكن عند جلوسي فاجئني ما رأيت, فعند النظر للأسفل بإتجاه قدمي وجدت نفسي لابساً فردة واحدة كاويش .. يا شينك ليلة, ولم الاحظ انني امشي اعرج !!!) .. ونطق من كان يجلس على المكتب.
* نوض.. نوض.. صبي ... قعمز لوطه, و من قالك اتقعمز اصلاً.
- الراجل هضكي هوا اللي قالي قمز.
* ويعني شكلك هضا المعفن يستاهل كرسي بيش ايقعمز عليه ... أنهض .. أنهض .. ووجهك للساس لعند أنقولك.
- ( لا باهي للساس للساس , وشنو فيها .. هذي احتيطات أمنية يجب اتخاذها ضد الأعداء .. أمالا شنو ..للساس للساس ..تي ماهو الساس مفيد )
* تعال .. تعال .. اكتب اسمك بالكامل خماسي.. اه, وأسم عائلتك بالكامل وأبناء عمك وخالك وكل اقاربك اللي قاعدين جوه وبره, ونهارك أمطنطن كان تنسى واحد كلب قاعد بره وما اتقولش عليه آه, وأصحابك من المدرسة الثانوية لعند الجامعة وكل جيرانك اللي تعرفهم .. تنسى حاجه نهارك أسود يا أحمار أه.  (جئت للمكتب ومن الطبيعي قربت الكرسي لأجلس عليه واكتب ما جاء على المكتب وبالأوراق).
* والله .. باهيه والله .. تي قتلك على الوطا .. على الوطا قتلك يا كلب .. خوذ هذك التركينة واكتب, تفهم ولا .. لا.
- حاضر حاضر ... حاضر يا أفندي. (وشكله أتقول إلا حكومة رسمي ... غـفغوفة الشعر والمسلقة, انتينا رسمي, لا والتجعوينة وتعويجة اللسان .., عالم من علماء حماية الوطن, امالا شنو .... تي منهم مافيش نقاش, وهضا بوها كيالها شكله.
(وكتبت لعند بطلت في الأوراق .. ولا أخفي عليكم الأسئلة تقراها تكره روحك)
* كملت ولا لا
- لا خلاص يا أفندي كملت .. وأمنسيتش شي ... وأمنسيتش حد بكل.
* هاتها هنا ... انت بالجامعة (مع وضع ثلاثة شدة على الجيم) تقرا.. اه ؟
- نعم بالجامعة ... لكن عليش جايبيني هنا يا أفندي ؟؟ والأمتحانات اقريبات والله.
* جامعة ... الجامعة خلاص نبو انسكروها يا فرخ ... وأشكالك المسردنة هذي معش نبوها في الجامعة.
- (ويقعدوا فيها لشكال المعفنة وبس ... ودورات كذب بره, وفلوس, سيارات اتبوزوا علينا بيهن, والأمتحانات في الحواشين, وتضربوا في الدكاتره, لا عابيه ليبيا بيش تصلح .. تي توا هذي مش قهاير يا هوه ؟) ... لكن مش مشكلة غير طلعوني ما هال الحفرة بس وأنشالله تخرب .. وبعدين اسواقت الحافلات كنها, يعني نحنا نقعدوا نعلقوا في المارشات وانتم تقروا وتقعدوا دكاترة .. دكاتره متخلفين وحماة الثورة المجيدة !!!, لكن نحنا... نو ... يا زينك وطن ... يا مسمحك وطن.
* يا سالم ..سالم .. سالم .. نعم نعم يا أفندي .. شيل هال الفرخ لمكانه.
- (لا باهي يعني كتيبت أوراق من غير حاجة أخرى ,, اوو ديمقراطية .. حقوق إنسان هذي .. مش مشكله ... لكن هلي شنو دايرين أزعمك .. أكيده العجوز قالبتها عزا رسمي .. أكيده ما فيهاش حكت وذن .. ولاما الدنيا كلها .. أكيده الحوش يملا ويفرغ)
لكن مش مشكلة بسبيل عزة الوطن .. لا عليك يا سيدنا الوطن, امالا شنو, سيدنا الوطن قوي راهو.
 

انتهى الجزء( 4) ولنلتقي بالجزء التالــي من التحقيق والمعتقل
 

والسلام عليكم
 

بنغازي 17  - ح ع م

حركة العصيان المدني بليبيا

esslibyabz@yahoo.com

راجع:  الجزء الأول   الجزء الثاني   الجزء الثالث