02/11/2007

كل الرسائل تنشر كما هى وبدون تصحيح للأخطاء الإملائية أوالنحوية

لأول مرة بالإتجاه المعاكس: القذافي .. والمواطن الليبي ((قبلي صرهادي))
وجهاً لوجه بحوار حر(الحوار من ثلاثة أجزاء ...)

الجزء الثالث والأخير

راجع: الجزء الأول    الجزء الثاني

• تنبيه: ستكون الحلقلة الجديدة بالإتجاه المعاكس لقاء مع المعارض الليبي السيد محمد بويصير/ والسيد من داخل ليبيا الطويل الهافي .. الرجاء من لديه اية ملاحظات بالخصوص توجيهها مباشرة للعنوان المدون أدناه. ومن لا يرغب من المعنيين الرجاء تبيهنا كذلك.

لنتابع الجزء الثالث:

  حسناً سيد (قبلي صرهادي) .. السؤال موجه اليك أيضأ ... ولكن لماذا هذا الهراء الذي تنطق به الآن .. لماذا لا ترى إلا الجزء القاتم بالموضوع ولا تنظر إلى الجزء المضيئ .. من أفضال الثورة والنظرية العالمية الثالثة عليك وعلى كل ليبيا ... هي عملية التحول المستمر بليبيا .. الم تتعرض ليبيا للحصار الدولي الغاشم لمدة طويلة ,,و كانت له الأثار السيئة على الحياة بليبيا وأقتصادها هذا أولاً ... وبعد ذلك الم يكون من الحكمة أن نطأطئ الرأس عند الموجه الكبيرة .. ألم تتعرض ليبيا وتتصدى لأكبر دولة بالعالم ألم تكون حكمة القائد عظيمة لكي لا يصاب الليبيين بأي أذى .. كما نراه ما يحدث من دمار بالعراق أو الصومال أو حتى بغزة ..مثلاً ؟

  هو وريني حتى أربيع جزء مضيئ وأنا معاك ...وبعدين الأفضال اللي تحكي عليها وين؟ والتحول المستمر صح موجود ..مرة مؤتمرات ... مرة جمهرة مرة كيمونات... مرة شعبيات ..وكلها (على وزن كبيدات) يا راجل ..؟ وخوذ من التحول لعند تبطل ... الناس أتحارب في الأمية ونحنا بليبيا شباب أصغار أميين لا أقرايه لا كتابة.. فقر و من بيع الدخان في روس الشوكات ...أمية ... على وزن القائد الأممي ... أي تحول يا سيدنا ( فيصل ) شيل الله برجال الله ؟ ... وبعدين اتجي أتقولي نطأطئ الراس ...وهي عليش الفوحلة الزايدة ما لول ...تز في أمريكا ..طز في الأمبريالية ... وكملها أنباش في أنباش ..وحتى العرب مانجو منه حسني البارك ... وخــنازير الجزيرة ... ومدور الحمير ... وريغن يا راعي لبقر .. وتقولي موجه كبيرة ما كبيرة ... هذي في ليبيا أيقولولها فوحلة زايدة ودفنقي .. وبعدين كيف المواطن الليبي بأمان .. والقتل قعد بالبلاش في الشوارع والمستشفيات والايدز والكبد والوبائي ... للسجون .. للـ ــــ

  والله.. والله.. يا وجه القديدة.. إلا موجود في هال القناة ومانك في ليبيا بس ــــ

  أرجوك .. أرجوك .. أرجوك .. أرجوك ..سيادة العقيد .. (وأقسملك بالله إلا عال الشواية طول يا خرى ..يا عافن) أرجوك .. أرجوك ..سيادة العقيد دعه يكمل .. أرجوك .. أرجوك ..سيد قبلي .. لا تخرج على موضوع الحلقة ..تفضل أكمل:

  عموماً أنا فعلاً أمتاع خزازين لكن مش حان أنرد عليك ....وبعدين أتقولي سيد قاسم أن الحصار له أثار سيئة على أقتصاد ليبيا والحياة بيها .... أقسملك بالله .. أقسملك بالله ... هذا اللي قاعد قدامي .. إلا فرحان يا راجل بالحصار على الشعب الليبي...صدقني فرحان ومسرور.. وجلاد وهابي .. الحصار كان على الأسلحة والطيران بس يا سيد فيصل .. مكانش على دوا ولا مكرونة ولا سفن تجارية ولا كورة ولا ... تي حتى الكورة لما يخسر الفريق الليبي خمسة شي ... أيقولو الحصار الغاشم ... ولا لعيال في الفصل أوصل عددهم لعند ستين عيل في الفصل أيقولوا كله ما الحصار الأمبريالي ... حصار الوذن يا بالقاسم ... وانا قاعد نقسملك بالله أن الحصار إلا طنجرة ولقت مغطتها ... وبعدين تي كم له سنة سيدنا الشيخ الحصار راح ؟ كم له زال.. أه .. ومزال الليبيين يعانوا كل يوم من حصار الكبير في قوتهم وحياتهم المشقعبة ... من هذا الرجل (بطل الحصار القومي).. ويموتوا الليبين كل يوم من الحصار الحقيقي اللي دايره عليهم .. الحصار الحقيقي والصح كان على العراق والمرحوم صدام أحسين .... مش علي هال الـــ .. ولا خليها ساكته خير. لن أستخدم الألفاظ السوقية اللي يستعملها وهو متعود عليها. لأن الماء بما فيه ينضح ...

  أولاً أمريكا حاصرت الشعب الليبي لأسباب معروفة عند الجميع والمشكلة الحقيقية أن العرب ساعدوا أمريكا والغرب .. تحت مسمى المجتمع الدولي بالحصار على الشعب الليبي .. والحصار كان مفروض علي ليبيا بالشكل اللي يعرفه العالم كله .. ولا تعرفه أنت يا راس الباذنجاله الخاربة .. وبعدين بالفعل كنا أنعاني في ليبيا حصار أمبريالــــي غاشم فعلي على كل أوجه الحياة بليبيا وهذا أيضا الناس كلها تعرفه والعالم أيضاً يعرفه .... لكن بيش أتغيير الحقائق يا قبلي يا صرهادي .. هذا دليل على أنك قصير النظر .. وتحتاج لعلاج مكثف لك ولأمثالك .. ونحنا في ليبيا سنهتم بيكم وبأشكالك ... ودليل وجود هال القبلي هادا قودامي .. دليل على الشفاقية في ليبيا.

  حسناً سيد القذافي .. اريد أن أسألك الآن بخصوص سلطة الشعب ونظريتك العالمية الثالثة وكيف تطبق على أرض الواقع بليبيا ... تفضل سيد القذافي:

  نعم .. هــ ــ ـوا .. الــ ـنظرية العالمية التالتة وفكر الكتاب لخضر .. هي طريق الخلاص للشعوب المهضومة واللي ضاعت فعلياً بترهات الأحزاب .. والمجالس النيابية وغيرها ... والنظرية العالمية الثالثة تقول التمثيل تدجيل والحزبية إجهاض للديمقراطية ومن تحزب خان شعبه وناسه .. ووضعت الحلول الجدرية لكل المشاكل المتعلقة بحرية الشعوب ... وبعد ذلك لتنظر التطبيق الفعلي للنظرية بليبيا مثلاً .. المواطن الليبي الآن هو المواطن الوحيد بالعالم اللي يستطيع أن يقرر مباشرة وبحرية تامة بأي شي يريده لحياته وحياة أولاده ... المواطن بالشارع ولا بالنقابة العمالية ولا بمكتبه يقدر يقرر بمؤتمره أي شيئ ببلاده من سياسة أبلاده ... لأعند أوكاله ووكال أبنائه ... وهذا النظام البديع هو بالفعل اللي يكرس حق الجماهير بالقرار .. فالمؤتمر الشعبي الأساسي هو البوتقة الشاملة لكل شيئ .. من الصحافة الحرة .. فالمواطن السيد .. يستطيع وبجرائة وبحرية تامة أن يقول بمؤتمره .. وهذا دليلي تقدم النظرية بخطوات عن ماهو موجود بالعالم الآن ... وأيضاً بهذا المؤتمر يستطيع المواطن أن يصل صوته وقراره مباشرة للمؤتمر الشعب العام اللي يتولى تنفيذ قرار هذا المؤتمر ومن هنا تتضح فكرة النظرية العالمية الثالثة وفكرة المواطن السيد.

  حسناً أستمعت لهذا الكلام المهم سيد قبلي صرهادي فماذا سترد:

  أولاً ربما سأطرح سؤال سابق لم يجاوب عليه ..لكن حرصاً مني على وقت البرنامج سأدخل مباشرة بالإجابة .. من خلال كلامه ومن خلال مايجري بليبيا من أحداث .. أو متعلمنها من هذه النظرية .. نعرف وكما قال أن النظرية وفكرة المؤتمرات تتيح للمواطن أن يكون ذات سيادة بالقرار ... حسنا .. تخيل معي أن الشعب الصيني وعدده الهائل أقتنع بهذه الفكرة وطبقها بالتمام وكما يقول المرشد والقائد والمفكر صاحب النظرية .... (لا تقاطعني ارجوك .. فأنا لم أقاطعك) ... والسيد الشعب الصيني مثلاً ببكين العاصمة ... أنفلتت أجعبه خزان ببكين العاصمة الصينية ... على حسب النظرية الثالثة يجب أن يجتمع المؤتمر الشعب الأساسي ببكين المركز وليجتمعوا لمدة شهر ونيف بخصوص تلك الجعبة المنفلته ...بلاش بلاش الصين واجدين ... في القاهرة ياسي البي اللي عددها 13مليون مصري ... تخيل معي .. أنهم يريدوا أن أيوقفوا مياه النيل لأستخدامه بالحمامات مثلاً ولأنهم أكتشفوا فيروس خطير بالمياه ..هل ستجتمع مصر كلها لمدة شهر بخصوص هذا القرار ؟ وباهي لما أتكون القرارات متساوية ومجموعة من المؤتمرات تقول لا.. ووحدين نعم هل يعاودوا الإجتماعات من جديد .. وتقعد حياة المصريين أجتمع في أجتمع .. وريحوا فيها هما وجماعة الصين الشعبية اللي عددها مليار ونص نسمة ... أنا سأسالك بمباشرة هنا: لماذا من بين هؤلاء العلماء بالعالم أجمع والفلاسفة لم يخرج مفكر واحد ويقر هذا الحل العالمي ببلاده حتى الآن ؟ .. بلاش ... توا واحد مريض مثلاً ويحتاج لعملية جراحية عاجلة ... هل سيجتمع مؤتمر طوكيو الأساسي ليقرر المواطن الياباني هل أديروا يا الدكاترة العملية أم لا ...ولا يبوا أيغيرو طرف للسيارة التيوتا ... هل يجمع الشعب اليباني ...هضا أيقول الطرف يركب من تحت وهذا أيقول الطرف تبيله رونديله بيش يركب أكويس ... الحياة بها تخصص يا سيدنا القائد ... والذي يقرر بإنشاء مستشفى ولا شارع ولا حتى بناء مصنع تمر.. هو الإنسان المتخصص بهذا المجال .. مش عامل البرويطة في سوق الخضرة .. وهل توا أستفتيت الشعب الليبي بهذا الأمر ؟ وانت وصل بيك الحال لتقول أن الليبيين أغبياء وجهلة وأميين ... لوكان النظرية طبقها الشعب بسويسرا لنجحت نجاح باهر... أكويس أذا الليبيين فشلوا وانت فشلت ... شنو الحل بالله ؟

  الحل توا تعرفه لما تنزل بيك الطيارة على تراب ليبيا بسلامة الله يا قبلي !!.. وبعدين هال الكلام اللي قولته كلها دليل على أنك غبي وساقط بسنة سادسة أبتدائية ... أنت ما ترعفش لعند توا أن ليبيا توزعت لكيمونات يا فالح يا أعيون ألبوبريص ... وبعدين لازم ...لازم أنديرولك دورة عقائدية بيش تعرف النظرية العالمية الثالثة أكويس ... ونحفظوك الكتاب لخضر لعند يطلع من أخشومك هادي ... توا أنت بني أدم بالله تحساب روحك ... أنت لازم الليبيين يجتمعوا كلهم بيش يقرروا بمؤتمراتهم أن أنت وأمثالك لازم أيعالجوهم أكويس ...وأحني عالجنا ناس هلبة من زمان .. وقعدوا ناس صالحين و مواطنيين ممتزاين بعد هكي أخلاص.

  عفواً ... عفواً.. عفواً هناك أتصال هاتفي اخر ... تفضل سيد (بو حولية) من ليبيا تكلم ولكن بإيجاز لوسمحت لم يتبقى إلا وقت قليل ...تفضل بالكلام:

  الو ...الو ...الو ... الو ...الــــــــــو ...الو ... (تسكت يا فرخ الخط جمع أمعايا ... أسسس ) الو ...الو ...الو ...

(نعم سيد بوحولية تكلم ..الرجاء خفض جهاز التلفاز لديك .. تفضل) الو ... الو ...الو ... (باهي .. باهي تره واطي العازي) ..

أولاً أحني بالجماهرية لا نقول جهاز تلفاز .. نحنا بليبيا أنقول جهاز مرئي .. (ممتاز لأنك صنعته أنت ممتاز لغة عربية .. تفضل) ثانياً.. هادا.. هادا.. القبلي هادا نموذج سيئ للمواطن الليبي .. تي هادا القبلي مش ليبي يا دكتور فيصل ..أني متأكد أنه مش ليبي ومدسوس .. تي هادا مش عارف الف با بالنظرية البديعة الثالثة ...هادا كيف أسظفتموه بالله .. وين القيتوه .. في بلوعة ... تي هادا غير يرجع بس ـــــــ

(ارجوك .. سيد بوحولية بدون تجريح .. والسيد قبلي ليبي مثلك مثله .. تابع لكن بإيجاز لوسمحت .. وأسأل سؤالك مباشرة) ...

والله توا أنوروك يا تافه يا ـــــــــ

  لم يبقى من وقت البرنامج إلا القليل بنصف دقيقة سيد قبلي .. سيد قذافي .. لو سمحت:

  لا هو أنا ليبي ميه ميه ومتاع خزازين ... لكن الله غالب ما تعلمت في الجامعات اللي تعلمت فيها يا بوحولية ـــ أنا أقترح يا سيد الدكتور بالقاسم أن يخرج الليبين وكلهم عيال وصبايا ورجالة وشيوخ ...كلهم اللي بالداخل واللي بالخارج ويشيلوا أكلميتين مكتوبات فوق روسهم .. لا للتدجيل علينا خلاص سيبونا بالله .... وبعدين أنا ـــــــ
 

  أنا أؤكد أن الشعب الليبي كلها يمقت ويفند كلام هذا الصرهادي ... والنظرية والكتاب لخضر سائر .. ولي مش عاجبه ..أهو لبحر ويشرب منه ــــــــــ

  أيها الأخوة المشاهودن لم يبقى إلا أن نودعكم ونتمنى أن نلتقي بكم بالأسبوع المقبل بإذن الله.. وهذا فيصل القاسم يحييكم والسلام عليكم ورحمة الله وبركاته ...

أنتهى الجزء الثالث والأخير من الحوار... تابع الحلقات القادمة.
 

بنغازي17
حركة العصيان المدني بليبيا
esslibyabz@yahoo.com
 

مساهمات سابقة:

  سعرالبرميل النفطي 86 دولار

  سعر برميل النفط يتجاوز الـ 92 دولار للبرميل

  الشيخ مستر تخصص بقايا الجبهة (وقـصة البنت الهولندية)

  هل تم القبض على الخائن ؟

  حسن الأمين وأفواه للحربوات الناطقة

  صدق ولن تصدق (باب الحارة ورمضان بليبيا)

  فيدو النهر الدموي وصقر الميدان والعصيان

  موطنوا سرت العظمى (عبدالباسط محمد.. والفضاء وحيداً)

  ما الذي وراء برنامج بلا حدود بالجزيرة؟

  الغولة وبنياتها والحليب.. والإيدز