11/06/2008

رد علي ولد بلاد والدكتور كلاشن

والله لقد اصبت كبد الحقيقة في جميع اقوالك بل اسمح لي ان انحني وابوس قبوعة راسك كما يقولون ياسيدي. بل واضيف مقترحا جديدا لعلة يكون الحل والعلاج الشافي لمشاكلنا ومشاكل الثوريين ومن سار علي نهجهم الي يوم الدين لماذا لا يتم توطين الليبيين في بلد اخر تشيلي البيرو نيكاراغوا او كوستاريكا واللة البرازيل اسوة باخوتنا فلسطينيو العراق الذين تم توطينهم هناك والذين اصبح الليبيون ينظرون اليهم بعين الحسد .. قد تبدو الفكرة غريبة لوهلة ولكن لما لا الليبيون الان غرباء في البلاد ومشاكلهم لا تنتهي بل انهم اصبحوا ضيفا ثقيلا علي النظرية واللجان وان يقتصر البقاء في الجماهيرية العظمي علي القذاذفة وحلفائهم واللجان والرفاق ومجاهدين التلفزيون والمستفيدين واخيرا كل من يرى في نفسة انة سيكون مستفيدا من الثورة فليبقي. والباقي يغادر بهدوء وبدبلوماسية وبالمراضاة وبالتالي تحل مشاكل الجماهيرية دفعة واحدة لا مصروفات ولا ميزانية ولا سرقة ولا بنية تحتية ولا فوقية ولا عمولات ولا امن ولا طوارى ولا معتقلات وعلي الجانب الاخر راقدين الريح يستفيدوا يتعلموا لغات ويشوفوا بلدان جميلة والشباب يتزوج ويلاقي وين يسكن ويلقوا وين يشتغلوا وفي المستقبل يبقوا جالية ممكن تستفيد منها البلاد واهم ما في الموضوع ياسيدى يتريحوا اللجان من الناس ومن مشاكلهم مش خير خصوصا بعد فشل مشروع التوطين في افريقيا بعد ان اصبحت افريقيا تلقى با بنائها في اليم قبالة لامبيدوزا وجزر الكنارى والخالدات.

ياسيدي الجماعة مضايقين منا الليبيين ما عادش فيهم فايدة زمان استعملوهم في الحرب مع تشاد واوغندا ومصر وتونس وتوا قعدوا بلا فايدة كيف الضيف الثقيل اللي قاعد ديما يبي فلوس ومصروف والمصروف في البلاد علي قد الفايدة اللي فية فايدة للجماعة يصرفوا علية واللي مافيش يتمنوة يموت ويخفف وانا اتحدي يا ولد بلاد لو الجماعة يفتحوا هالباب بس بضمانات وبحضور الامم المتحدة واللة يا ولد بلاد ما تلقي فيها واحد. والجماعة يعيشوا في راحة وهناء وحتي بعدين يعملوا اعلانات في مكاتبهم الشعبية ايسموها اعلانات توطين مثلا ايقولوا كل سنة نبو عدد كذا مهاجر ويحددوا الوانهم واشكالهم ويحطوا شروطهم عاد باش اللي ايجي ما يتعبش الجماعة ويقعد يخلقلهم في المشاكل يخدم ويسكت وياخذ فلوس وبس. وتمشى الامور تمام التمام الموضوع راهو مليح وفية حل لجميع الاطراف وراهو خير من اقعادنا نين انكملوا بعضنا وما يسير شئ والجماعة بعدين يلقوا ارواحهم كيف زنوبيا اللي قعدت ملكة علي اموات. راهو كل اللي مطلوب اشوية شجاعة من القايد وفتح الباب بيش اتعم الفايدة عالكل.

والسلام عليكم

الكانون