15/09/2008

هل تتحول ليبيا الى نظام الدفع المسبق

تعبت من المشي والجي على المسؤولين عطيهم طعين.. وانا عندي ولد لأبنتي صغير عمره هاوينا في منتصف الثلاثينيات وعنده لغتين رسمي وخمسة متعات شارع وعنده شهادة جامعية في العلوم السياسية مش العلوم ألي فاهمينا جماعة الخارجية.. رواتب وتذاكر وعلاج وفن اللقاقه. ومتوقعين هذا التخصص ألي يخدم ليبيا العضمى او العضروطة. المهم اسكرت قدامي كل الابواب والنوافذ... وزادت بنتي طيرتهالي, حنا معندناش واسطة شوفي ولد فلان وشوفي ولد علان..

لا شهادة ولا تخصص غير بس اهاليهم يخدموا في الخارجية ولا عندهم تريس باهيه في الدولة. وما قعدش قدامي, غير استخدام المكر والحيلة قلت ممكن هذا الاسلوب يمشي مع جماعة الخارجية على خاطر قريب لتخصصهم.. ودبرت عليه بنت جيرانا والحق ينقال سمحه وجميلة وسمباتيك ولسان يقطر العسل ولهجه تحكي بيها ما تعرفهاش لا هي ليبيه ميه في الميه ولا هي لبنانيه(ولنا معها قصة اخرى).. المهم قالتلي احسن شى كان تبي تعييني وليدك بري قابلي الامين وقوليله انك جايه من فوق أوي وتوأ تشوفي شني يصير! ومانكثرش عليكم هلبه مشيت نطلب في مقابله في شارع الشط وين ماتوجد الخارجية وفي البوابة قالولي تفظلي من تبي؟قلتلهم نبي شلغم الامين قالولي مني انتي؟قلتلهم قولوا له الحاجة وبس وجايه من فوق..مسكين الشرطي قالي تفظلي اجلسي ولحظة نتصلوا ونشوفوا كيف الوضع..غير سامحينا ياحويجه لحظة بس! وبعدين جاني واحد لابس بدلة محترمة وقالي هيه معاي سعادة الامين يستنا فيك ياحاجة... قلت سبحان اللة شني ها السرعة في الموافقة وشني ها الترحيب من مدير مكتب الامين!وفي الطريق الى مكتب الامين سائلني سكريتيره شني تشربي ياحاجة قهوة عربي ولا كابتشينو ولا عصائر.. سكتت مارديتش عليه في بالي قلت غير نوصلوا مكتب الامين وبعدين ساهل.. وبعد ما وصلنا مكتب شلغم قالي السكرتير لحظة وحدة وتكوني عند الامين على خاطر يعد في نفسه لمقابلة مع سفير الصين.. يدوي ثواني وقالولي تفظلي ياحاجة... ماتحكيش مكتب مدندن وفرش فاخر وهواتف وكمبيوترات وصالون عمري ماريته غير في التلفزيون, وأول ما خشيت قالي شلغم مرحب بالحاجة بالاهي منو باعثك توا وانا راني مشغول هلبه اليوم.. هنا اصابني الارتباك ولكن ربك ستر وقتله من طرف احمد..تغيرت ملامح وجهه وقالي شن حال الاستاذ وكيف اسرته وخيره معاش معدل علينا.. توا فرحة وقتله حاله باهي ومشاغله هلبه وقالي بالاهي شني صلة القرابة بالاستاذ قلته نسمى خالته.. سكت شويه وبعدين كلم سكرتيره وقاله الغي كل ارتباطاتي اليوم فقال السكرتير موضوع سفير الصين قاله عبدالرحمان طز ياراجل قتلك الغي كل شىء.. انا مشغول مع الحاجة!الحق استغربت ومافهمت شىء وحتى احمد قلته هكي وخلاص غير جاء زي مايقولوا على راس لساني..قالي ياحاجة الحق ولد اختك احمد ليه عليا فضائل واجده وهو ألى كان السبب في جيبتي هنا في الخارجية ولكن توا بعد ماسمعوا صحاب الشر بان الامانات بقلصوها وان الخارجية بتقعد حطوا عينهم عليها وبدوا يبرابشو في حاجات تخصني مره يقولو حط خوه سفير ومره يقولو متع شرب والمهم الكلام اكثر وانا واللة ياحاجة وانتي ماتحلفي فيه ان الخارجية في وقتي مخليها احسن امانة وفيه كل التخصصات من هندسة النفط الى الفيزياء النووية الى الكيمياء الحيوية... وكلها مدايرها كوكتيل ومافيش قرار يطلع مني الا بعد مانقسم على الجماعة كل واحد حصيصته ومع هذا كله مش عاجبهم شىء وياخالتي نبيك توصلي كل الكلام الى خونا احمد وانتي موضوعك ألي جايه من اجله اعتبريه تام..تنهدت شوية وقتله موضوعي ولد بنتي يبي يتعين هنا..ضحك وقالي تقصدي ياحاجة تبيه سفير قتله ياريت وضبح على السكرتير وقاله خوذ ملف ولد بنت الحاجة ورميه في المقترح متع السفراء المهمين.. وزاد قالي أمانة عليك ياحاجة توصلي كلامي وانشاء اللة بعد اسبوع ولد بنتك ولي سفير في اوروبا... وللحديث بقية بين الحاجة ووزير الخارجية.

علي الطالب
 

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة