23/09/2008

الحاجة الطرابلسية في وزارة التعليم العالي

اليوم الحاجة الطرابلسية, والحق يقال تبي تعترف لكم بان السيد الوزير شلقم أهل للوزارة وعند امكانيات, غير زي ماتعرفوا الوزير في العالم الثالث يحتاج لهامش معين باش يمكن تشوفوا امكانياته. وبالرغم من اني حاجة بيت ربي ومن غير الخلابيط ألي اعترف مدايره وشخصية المهزوز قدام الاسماء الكبيره والكبير اللة ولكن ماعندي مانقول فيه غير كل خير من حيث الكفاءة. وتعالوا توا معاي باش نزوروا وزارة اخرى بانية عليها الامال والطموحات في صنع الاجيال وترشيد التنمية المستدامة في البشر. وهذه وزارة او امانة التعليم الواطي.. اسف جدآ سامحوني العالي وحتى كان الحال مايختلفش هلبه. وقلت طالما موضوعي الاول في الخارجية مشى واسقد يعني ولد بنتي ممكن يسير منه ويصبح سفير وكان ظني ماخابش اكيد لكن مش في اوروبا زي ماوعد رحومه شلقم ممكن يكون في ولايات الافروكان_افريقيا. مايخالف المهم سفير. ولما سمعت دوأوي ياسره على التعليم والافاد للخارج وبعدين الموضوع دراسة او مشرف طلابي مش حاجة كبيره وعلى خاطر صغار بنتي اكثر من عشرة معناه يادوب يسدو في الامانات القعدات وقبل مايضمولهم سقالتهم وريحوا فيها. توكلت على المعبود ومشيت لشارع النصر وزي العادة في البوابة اللوطية لقيت شرطة وحدين لابسين مدني. واحد خاش واحد طالع وفيه شوية ربكة.المهم قصدت راجل اشنب وقتله انا الحاجة ونبي نقابل عقيل. قالي ياحاجة تسحابي الدنيا ساهله. انيرولك موعد وانشاء اللة الكيل الاقي.. قتله ياوليدي ماتعبنيش انا معروفه وجايه من فوق! ارتخوا اشنباته ونحاء الدخان من فمه وقالي كيف ياحاجة؟ قتله شكلك ماتعرفنيش.. قال لا سامحيني بس لحظة نتصل بمدير مكتبة ونبلغك, يودي مافاتتش دقيقة ونزل وليد سمح اسمه طارق وقالي هيه اركبي ياحاجة الدكتور عقيل يرجىء فيك!وركبت الدرج حتى وصلت مكتب الامين وقعدت في الصالة ننتظر, وهاكا الوليد طارق بدء ينشد فيه شني حالك ياحاجة وانا يقصد على روحه من الزاوية ومن عيت القناص ويقربلي المختار القناص واكيد ياحاجة تعرفيه!وكثر عليه الهدرزه الفارغه وقتله ياوليدي انا تعبانه شوي من الدروج ومعادش انجمع هلبه تراه شوف لي عقيل.وبعد ياودي خمسة دقائق طلع من مكتب عقيل وكان مقابلني اجي زوز طارسه لابسين بدالي باهية!وقالي طارق تفضلي ياحاجة الامين في انتظارك. دخلت الى مكتب عقيل والحق ينقال مكتب فاخر وفرش محترم وهواتف هلبه وكمبيوترات ياسره و ورق قدامه هلبه وشكله اقصير يودي راسه مابانش من الورق والملفات,وناض سلم عليه وقالي مرحبه وشني تشربي..وبعد شوية خش علينا واحد صامت وبدون استئذان واسمه عبدالكبير وقال الى عقيل يادكتور اتصل بيه الدكتور عبداللة والحاج ابراهيم وسماء زوز اخرين انسيتهم وقالولك تم الموضوع وحول القائمة اليوم للبغدادي.. رعش عقيل شوية وقال لعبدالكبير قولهم حاظر اليوم نعدل القائمة ونضيف الجماعة ألي يبوهم وغدوه تكون في اللجنة الشعبية العامة,وهنا,رد عبدالكبير وقال للوزير مادام مازال بدير فيه تعديل حتى انا عندي اربع انفار نبيهم في القائمة وقاله عقيل خلاص فكنا ياراجل هوينا عندك فيه ثلاثة ومعادش نقدر انزيدك اكثر.. قال عبدالكبير باهي وطلع..يودي مااثقل دمه! قالها عقيل بعد ما طلع عبد الكبير وانتهزت الفرصة وقتله هذا شنو ألي خش علينا هكي قالي حشاك ياحاجة هذا الكاتب العام وفعلآ خاص مايقبله حد من برودت دمه.وبعدين استاقض عقيل وقالي تفضلي شني ياحاجة وسامحيني الهيت وهذا حال الشغل. وزي العادة قتله انا جايتك من طرف ولد اختي احمد.. وقف وجاء سلم عليه ثاني وكب على ايدي.. وكلم طارق قاله معاش تخلي حد يخوش حتى عبدالكبير ولا غيره انا مشغول جدآ. وبدء يتنهد ويقول أخ لولا حمد انا ماكنتش هنا, وحمد ولد اختك ياحاجة لعبلي دور كبير ودخل حتى التوازنات القبلية باش صار مني.وتوا الزلافيت ألي يتصلوا ويبوا هلبه حاجات كانوا ضدي وكانوا بيرموا عبدالكبير ألي كمل جامعة سبها ومسحها ولكن حمد بارك اللة فيه هو ألي العب الدور وخلاني وزير والله عمري ماحلمت ان انكون في هل مكان ولا حتى غيره من الوزارات. لكن زي مايقولوا دوام الحال من المحال وانا ياحاجة مضايق هلبه والجماعة شادين عليه اجي خمس ملفات باهيات يخوفوا, واللة حتى نوم الليل ألي يقولو به مانرقش فيه باهي.. ونبيك اتكلميلي خونا احمد يديرناش حاجة في الملفات وهذا طلبي واللة حتى الامانة قلصوها ولا عقدت معادش نبيها,وحتى هل الفرخ طارق تركب عليه وورطني في الدوه الفارغه.... والكلام متعه الوزير كثر وانا قلقت وقتله ربي يستر وتوا نكلم حمد ويحاول يساعدك..وقالي اسف ياحاجة خذاني الكلام انتي بالك عندك اي خدمة عندنا.. سكتت شويه وقلت في بالي وحسب مافهمت برنامج الاشراف الطلابي وتموه وموضوع الدراسة البره معاش وكل عيش, يبقاء احسن فكرة المقاولات.. قتله ياوليدي انت شكلك متورط هلبه وانا مانبيش انزيدك على بلاك, غير عندي ولد بنتي مداير تشاركية بناء وصيانة ونبوه ياخذ من عندكم مشيرعات وعقود مرات حتى يبيعه ويمشي حاله.. قالي خلاص ياحاجة يجيب ملف التشاركية وكل مشاريع التعليم من بناء وصيانة اعتبرها رست عليه. وغير انتي ماتنسيش ألي قتلك عليهم.
 

علي الطالب

راجع: هل تتحول ليبيا الى نظام الدفع المسبق
 

جميع المقالات والأراء التي تنشر في هذا الموقع تعبر عن رأي أصحابها فقط، ولا تعبر بالضرورة عن رأي إدارة الموقع >>>> ليبيا المستقبل منبر حر لكل من يطمح ويسعى لغد أفضل لليبيا الحبيبة